|
Sestaoko udalerriak udal aurrekontuak berritu ditu 2012 urterako. PNV-ko gobernu batzordeak Bilduren babesa eskuratu du, talde honek proposatutako emendakinen ia osotasuna onartua izan ostean. «Aurrekontu sozialei begirako lehen pausoa da», Iban Lantxo, taldeko bozeramailearen arabera. Onartutako emendakinen artean, euskara, politika sozialetan eta berdintasunean lortutako aurrerapen esanguratsuak nabarmentzen dira Bilduren aburuz. Hala ta guztiz ere, politikarien soldaten jaitsierarako eta euskal presoen senideei zuzendutako diru-laguntza proposamenak ez dira onartuak izan.
Bilduk adierazitakoaren arabera, udalerriaren gastu soziala era esanguratsuan handitzea izan da bere apustua (aurreko legegintzaldiarekin konparatuz ia 370.000€ gehiago) Raxoik gidatutako gobernu espainiarrak bultzatutako murrizketa politikari erantzuna emateko. Bultzada eman zaie ere bai aurrekontu-sail programatiko estrategikoei, hala nola, euskara (ia %65 gehiago), berdintasun politikei (%35 gehiago) edo kulturari 150.000€ gehiago zuzenduz. Gainera, elkarte kulturalentzako diru-laguntzak jaistea ekidin da.
Udalerriak pairatzen duen langabezia tasa altuari erantzuna emateko helburuarekin, taldeak partida garrantzitsua gorde du udal lan plana sortzeko. Ekimen hauei immigrazioari buruzko diagnosia eta ondorengo planaren garapena gehitzen zaizkio, edo Mainueta (Los Baños) kalea oinezkoentzako egitea.
Iban Lantxo, Sestaoko Bilduren bozeramaileak, adierazi bezala «Erabakia ez da erraza izan, hauek ez baitira Bilduk gure herriarentzako diseinatuko lituzkeen aurrekontuak, ezta erabiliko lituzkeen formak ere ez. Hala ere, arduratsuak izanda, aurkeztutakoa hobetzeko lan egin dugu». Bozeramailea atsekabetua azaldu zen dokumentuak jasotzerako orduan epeak bete ez direlako «honek herritarrak kontuan hartuko dituen prozesu parte-hartzailea garatzea ekidin du, gure taldearentzako garrantzi bizikoa dena. Halako egoerei erantzuteko, denbora gutxiren buruan demokrazia parte-hartzailean sakontzeko proiektua aurkeztuko dugu, erabakiak hartzerako orduan herritarren parte-hartze erreala bultzatzerako bidean».
«Hobekuntza adierazgarria»
Plenoan, Sestaoko Bilduk «udal tasen bilketan politika fiskal progresiboa ezarri ezkero», gastu soziala handiagoa izan zitekeela azpimarratu du, «gehien daukanak gehiago ordaindu dezan, gutxien dutenen mesedetan». Horrez gain soldata eta dietetan murrizketak proposatu ditu «210.000€, gure kalkuluen arabera». Azken proposamen honi ezezkoa eman zioten udalean ordezkatuta dauden talde guztiek udalbatza aurretik egindako komisioan, udalerriko euskal preso politikoen senideei dispertsioari aurre egiteko diru-laguntza ematearen proposamenarekin batera errefusatua izanik.
|
